Crise?

Tanto se fala da crise, de que as regras da economía van cambiar, de que o importante son os postos de traballo! Almorzamos hoxe con esa fichaxe de millóns e millóns e euros, cartos investidos nun só xogador de fútbol mentres cada día miles de persoas van ao paro, centos de empresas, de autónomos ven rexeitadas as súas peticións de empréstimos ante os mesmos bancos que avalan a fichaxe alegremente. Se houbese un mínimo de pudor, de vergoña no país os responsables de tal ousadía agocharían os seus nomes. Boa parte da prensa mundial critica a fichaxe e boa parte da prensa española di que é unha grande operación financeira, a mesma prensa que só critica a corrupción cando é no contrario.

Cantos proxectos de animación á lectura se farían cos eses millóns? Cantos investimentos con postos de traballo incorporados? Pero non importa, como tampouco importa que estea a preparación do próximo curso parada porque toda a consellería concentra a súa enerxía nunha enquisa da que se nos prohibe informar nos centros (mentres hoxe os xornais teñen páxinas enteiras pagadas con cartos públicos). "Si eu fixen tal mundo, que o demo me leve" dicía o deus de Curros Enríquez. Pois como nos importa e moito, na nosa Biblioteca non imos quedar calados.

Open publication - Free publishing - More languages